Svartfjallaland – Góður söngvari hér á ferð en skelfilega púkó lag í alla staði. 
Ísrael – Það er mikið lagt upp úr því að þetta lag sé eftir Dönu International sem sigraði fyrir Ísrael 1998. Málið er að mér er bara alveg sama, það er alveg jafn leiðinlegt fyrir það.
Eistland – Eistar tefla fram fyrsta grínlaginu í ár, þau eru reyndar óvenju mörg þetta árið og hvert öðru verra. Þetta lag er mjög slæmt, og flutningur Kreisiraadio á því er það vitlausasta sem ég hef séð. Ég stend sjálfa mig stundum að því að lyfta öðru munnvikinu yfir þessu, en bara af því að þetta er svo ruglað.
Moldavía – Jazzlagið í ár. Ég get ómögulega hlustað á það.
San Marínó – San Marineringar (gæti verið heiti á matvælafyrirtæki híhí) eru með í fyrsta sinn í ár og mér finnst þeir ekki vera að slá í gegn. Þetta lag er bara of aumkunarvert.
Belgía – Nú erum við loksins að tala saman! Belgar senda almennilega spilandi þjóðlagaband sem syngur á ímynduðu tungumáli, lagið heitir O Julissi. Svakalega skemmtilegt, vel flutt og öðruvísi en allt annað í keppninni.
Aserbaijan – Aserar eru með í fyrsta skipti eins og San Marineringar, og eru með betra lag. Það er kröftuglega sungið af tveimur fýrum sem dubba sig upp eins og engill og djöfullinn...þetta er ekki versta lagið í keppninni, en það vantar viðlag í það og mér finnst þeir gera aðeins of mikið af að reyna að toppa hvorn annan í söngnum.
Slóvenía – Þessi sápukúla er svona þokkaleg, en ekki alveg nógu litrík. Ég vil fá Omar Naber aftur.
Noregur – Norðmenn eiga eftir að gera það gott í ár með henni Maríu sinni. Hún syngur mjög gott lag í anda Adele, Amy Winehouse og Duffy. Mjög flott og góður fílingur í gangi.
Pólland – Isis Gee er Kani, ekki Pólverji. Hún syngur ballöðuna For Life sem er í anda Mariuh Carey og Disney teiknimyndanna. Þetta er tónlistarstefna sem ég þoli ekki, og ég velti því stöðugt fyrir mér hvort Isis sé virkilega kvenmaður, þið skiljið hvað ég á við.
Írland – Brúðukalkúnninn Dustin keppir fyrir Íra í ár. Ég er einlægur aðdáandi Prúðuleikaranna, en þessi kalkúnn er mér ekki að skapi. Mér finnst hann ekki fyndinn, heldur bara frekar pirrandi og leiðinlegur. Lagið og öskrin eru enn meira pirrandi. Já þetta pirrar mig bara mjög mikið. Nema þegar hann öskrar “COME ON!!!!”, það er pínu fyndið.
Andorra – Mér hefur oft líkað við lögin frá Andorra, en þeim bregst bogalistin í ár með sápukúlupopplaginu Casanova. Of einfalt, fyrirsjáanlegt og ófrumlegt.
Bosnía og Herzegóvína – Ég elska þetta lag! Er þetta grín? Er þetta list? Hver veit? Þetta er allavega snilld og hefur mig alveg í vasanum. Furðufuglinn Elvir Lakovic er hér á ferð ásamt að mér skilst systur sinni sem er svo túberuð að annað eins hefur ekki sést. Þau fara alveg hamförum á sviðinu með skemmtilega leikmuni og leikræna tilburði. Lagið sjálft er líka frábært!
Armenía – Hin armenska Sirusho gerir góða hluti í ár með laginu Qele Qele, sem ég er mjög hrifin af. Þjóðlegu áhrifin klikka ekki. Ef hún stendur sig á sviðinu gæti hún auðveldlega náð topp 5 í úrslitunum.
Holland – Ég hef nú sjaldan hrifist af hollensku lögunum, og þetta lag er svosem engin undantekning. Það má samt alveg vera þarna og ég hef heyrt það verra frá Hollandi. Gerir samt engar gloríur.
Finnland – Mér er alltaf hlýtt til Finna. Þeir eru búnir að fara allan skalann í straumum og stefnum í júró, en núna láta þeir aftur slag standa með þungarokki, á finnsku í þokkabót. Mér finnst Hard Rock Hallelujah nú betra lag, en þetta er hressandi innan um allar poppskvísurnar. Missa Miehet Ratsastaa!
Rúmenía – Þetta er svona ofurgamaldags lag sem er skrifað nákvæmlega eftir formúlunni, sungið af konu og karli sem halda að þau séu Mariah Carey og Andrea Boccelli. Að sjálfsögðu alls, alls, alls ekki minn tebolli.
Rússland – Sjarmatröllið Dima Bilan er mættur aftur á svæðið eftir að hafa tekið 2. sætið árið 2006, og lagið í ár er ekki með tærnar þar sem hitt hafði hælana. R&B höfðar mjög sjaldan til mín. Kannski gerir heimsfrægi skautadansarinn það sem verður með Dima á sviðinu. Rússar komast samt áfram.
Grikkland – Kalomira hin gríska getur ekki sungið, en hún er á brókinni og það eitt kemur henni áfram í úrslitin. Þetta lag er mjög nútímalegt með grísku ívafi, svolítið eins og My Number One um árið, en það var miklu betra lag og Paparizou svakalega góð. Það er eyðilagt með lélegum og tilbrigðalitlum söng og alltof einhæfu viðlagi.
Já, eins og sjá má er ég ekkert alltof ánægð með fyrri undankeppnina, það er bót í máli að sú seinni er miklu betri. Reyndar verra fyrir okkur þar sem við erum í miklu harðari keppni! En þetta eru lögin sem ég held að fari áfram, hvort sem mér líkar betur eða verr:
Armenía, Bosnía & Herzegóvína, Noregur, Rússland, Finnland, Azerbadjan, Grikkland, Rúmenía, Pólland, Írland.